తెలంగాణలో బీసీ రాజకీయ ఐక్యతకు అఖిలేష్ యాదవ్ పర్యటన – ఘన స్వాగతం తెలిపిన బేరి రామచంద్ర యాదవ్

తెలంగాణలో బీసీ రాజకీయ ఐక్యతకు అఖిలేష్ యాదవ్ పర్యటన

– ఘన స్వాగతం తెలిపిన బేరి రామచంద్ర యాదవ్

శేరిలింగంపల్లి,

బీసీ రాజకీయ ఐక్యత లక్ష్యంగా తెలంగాణ రాష్ట్రానికి విచ్చేసిన ఉత్తరప్రదేశ్ మాజీ ముఖ్యమంత్రి, సమాజ్‌వాదీ పార్టీ జాతీయ అధ్యక్షులు అఖిలేష్ యాదవ్‌కు బీసీ ఐక్యవేదిక తెలంగాణ రాష్ట్ర అధ్యక్షులు బేరి రామచంద్ర యాదవ్ ఘన స్వాగతం పలికారు.

ఈ సందర్భంగా బేరి రామచంద్ర యాదవ్ మాట్లాడుతూ.. దేశవ్యాప్తంగా బీసీలను ఏకం చేసేలా సమైక్యత యాత్ర చేపట్టాలని, బీసీ రిజర్వేషన్లు, బీసీ డిక్లరేషన్, బీసీ కులగణన అంశాలపై కేంద్ర ప్రభుత్వంపై గట్టి ఒత్తిడి తీసుకురావాలని అఖిలేష్ యాదవ్‌ను కోరారు.

అఖిలేష్ యాదవ్ తన తెలంగాణ పర్యటనలో కాంగ్రెస్, బీఆర్ఎస్ సహా వివిధ రాజకీయ పార్టీల నాయకులతో సమావేశమై బీసీ రాజకీయ ఐక్యతపై విస్తృతంగా చర్చించినట్లు తెలిపారు. బహుజనులు, బీసీలు, ఎస్సీలు, ఎస్టీలు, మైనార్టీలు ఐక్యంగా నిలబడి బీసీ ముఖ్యమంత్రి లక్ష్యంగా పోరాటం చేయాలని బేరి రామచంద్ర యాదవ్ విజ్ఞప్తి చేశారు.

దీనికి స్పందించిన అఖిలేష్ యాదవ్, ఏ పార్టీ అధికారంలోకి వచ్చినా బీసీ ముఖ్యమంత్రి రావడం ఖాయమని ధీమా వ్యక్తం చేస్తూ, బీసీ ఉద్యమానికి అవసరమైన పూర్తి సహకారం అందిస్తానని హామీ ఇచ్చారు. తెలంగాణలో బీసీలను సంఘటితం చేసి అసెంబ్లీ, పార్లమెంటులలో కనీసం 50 శాతం ప్రాతినిధ్యం సాధించే దిశగా స్పష్టమైన ప్రణాళిక రూపొందిస్తున్నట్లు నేతలు వెల్లడించారు.

ఈ కార్యక్రమంలో తలసాని శ్రీనివాస్ యాదవ్, అంజన్ కుమార్ యాదవ్, గడ్డం శ్రీనివాస్ యాదవ్, మందాడి అనిల్ కుమార్ యాదవ్, జూబ్లీహిల్స్ ఎమ్మెల్యే నవీన్ యాదవ్‌తో పాటు పలువురు బీసీ నాయకులు, ప్రజా ప్రతినిధులు భారీ సంఖ్యలో పాల్గొన్నారు.