నంద్యాల: ముతుకూరి గౌడప్ప యాదవ్ 224వ వర్ధంతి ఘన నివాళులు

నంద్యాల: ముతుకూరి గౌడప్ప యాదవ్ 224వ వర్ధంతి ఘన నివాళులు

భారతదేశంలో బ్రిటిష్ పాలనకు వ్యతిరేకంగా తొలి దశలోనే పోరాటం చేసి, 1801 డిసెంబర్ 31న ఉరి కొయ్యను ముద్దాడి వీరమరణం పొందిన స్వాతంత్ర సమరయోధుడు ముతుకూరి గౌడప్ప యాదవ్ గారి 224వ వర్ధంతిని నంద్యాల జిల్లా కేంద్రంలో ఘనంగా నిర్వహించారు.

నంద్యాల పట్టణంలోని మహాత్మ జ్యోతిరావు పూలే సర్కిల్ వద్ద ఎస్సీ, ఎస్టీ, బీసీ, మైనార్టీ సంఘాలు, యాదవ సంఘం, విద్యార్థి-యువజన ప్రజా సంఘాల ఆధ్వర్యంలో ఈ కార్యక్రమం జరిగింది. ఈ సందర్భంగా గౌడప్ప యాదవ్ గారి చిత్రపటానికి పూలమాలలు వేసి బహుజన నాయకులు ఘన నివాళులు అర్పించారు.

వక్తలు మాట్లాడుతూ, బ్రిటిష్ పాలకుల అన్యాయాలకు ఎదిరించి ప్రాణత్యాగం చేసిన గౌడప్ప యాదవ్ గారి పోరాట స్ఫూర్తి దేశ స్వాతంత్ర్య చరిత్రలో చిరస్మరణీయమని పేర్కొన్నారు. బహుజనుల హక్కులు, ఆత్మగౌరవం కోసం ఆయన చేసిన త్యాగం నేటి తరాలకు మార్గదర్శకమని అన్నారు.

యువత ఆయన ఆలోచనలను ఆదర్శంగా తీసుకుని సామాజిక న్యాయం, సమానత్వం కోసం ఉద్యమాత్మకంగా ముందుకు సాగాలని నాయకులు పిలుపునిచ్చారు. ఈ కార్యక్రమంలో వివిధ సంఘాల ప్రతినిధులు, విద్యార్థులు, యువజనులు, స్థానిక ప్రజలు పెద్ద సంఖ్యలో పాల్గొన్నారు.