బీసీలకు 52% రిజర్వేషన్, రక్షణ చట్టం అమలు చేయాలి: వీరవల్లి శ్రీనివాస్

బీసీ చైతన్య వేదిక ఆధ్వర్యంలో తిరుపతిలో ప్రెస్‌మీట్

బీసీలకు 52% రిజర్వేషన్, రక్షణ చట్టం అమలు చేయాలి: వీరవల్లి శ్రీనివాస్

తిరుపతి మహానగరం ప్రెస్‌క్లబ్‌లో బీసీ చైతన్య వేదిక ఆధ్వర్యంలో ప్రెస్‌మీట్ నిర్వహించారు. ఈ సమావేశానికి బీసీ చైతన్య వేదిక తిరుపతి జిల్లా అధ్యక్షులు వంక రమణయ్య యాదవ్ అధ్యక్షత వహించారు. ముఖ్య అతిథిగా బీసీ చైతన్య వేదిక జాతీయ అధ్యక్షులు వీరవల్లి శ్రీనివాస్ హాజరయ్యారు.

ఈ సందర్భంగా వీరవల్లి శ్రీనివాస్ మాట్లాడుతూ—ఆంధ్రప్రదేశ్ ప్రభుత్వం ముందుగా సమగ్ర కుల గణన నిర్వహించి, ప్రతి కులం జనాభా వివరాలను ప్రకటించిన అనంతరమే స్థానిక సంస్థల ఎన్నికల్లో బీసీలకు 52 శాతం రిజర్వేషన్ కల్పించి ఎన్నికలు నిర్వహించాలని కూటమి ప్రభుత్వాన్ని డిమాండ్ చేశారు.

అలాగే, రాష్ట్రంలో బీసీలపై ఆధిపత్య కులాల దాడులు, హత్యాకాండలు పెరుగుతున్న నేపథ్యంలో బీసీలకు ప్రత్యేక రక్షణ చట్టం అవసరమని అన్నారు. ఎన్నికల మేనిఫెస్టోలో ఇచ్చిన హామీ ప్రకారం అధికారంలోకి వచ్చిన తర్వాత బీసీలకు రక్షణ చట్టం తీసుకువస్తామని ప్రకటించిన కూటమి ప్రభుత్వం, ఆ హామీని విస్మరించడంతో బీసీ చైతన్య వేదిక రాష్ట్రవ్యాప్తంగా ఉద్యమం చేపట్టిందన్నారు. దీర్ఘకాల పోరాట ఫలితంగానే ఇటీవల ప్రభుత్వం బీసీ రక్షణ చట్టం ముసాయిదా బిల్లును ప్రకటించిందని, ఇది బీసీ చైతన్య వేదిక విజయమని పేర్కొంటూ కూటమి ప్రభుత్వానికి ధన్యవాదాలు తెలిపారు.

అదేవిధంగా ఫిబ్రవరి మొదటి వారంలో తిరుపతి మహానగరంలో బీసీ చైతన్య వేదిక ఆధ్వర్యంలో రాయలసీమ ప్రాంతీయ బీసీ సదస్సు బహిరంగ సభ నిర్వహించనున్నట్లు ఆయన ప్రకటించారు.

ఈ సందర్భంగా గతంలో బీసీ చైతన్య వేదిక సమావేశాన్ని విజయవంతం చేసిన జిల్లా అధ్యక్షులు వంక రమణయ్య యాదవ్‌ను అభినందిస్తూ, ఆయనను బీసీ చైతన్య వేదిక రాయలసీమ జిల్లాల సమన్వయకర్తగా నియమించారు.

అలాగే,

• పల్లా మణి శేఖర్ యాదవ్ ను బీసీ చైతన్య వేదిక యూత్ జాతీయ అధ్యక్షుడిగా,

• వేలూరు పురుషోత్తం ముదిరాజ్ ను రాష్ట్ర ఉపాధ్యక్షుడిగా,

• లేపాకుల నాగరత్న ను చిత్తూరు జిల్లా మహిళా అధ్యక్షురాలిగా నియమిస్తూ నియామక పత్రాలను అందజేశారు.

ఈ కార్యక్రమానికి గౌరవ అతిథిగా బీసీ చైతన్య వేదిక తెలంగాణ రాష్ట్ర అధ్యక్షులు వంగ అరుణ్ కుమార్ గౌడ్ పాల్గొన్నారు.

ఈ సమావేశంలో బీసీ చైతన్య వేదిక తిరుపతి జిల్లా గౌరవ అధ్యక్షులు సుట్టి రవిశర్మ, చంద్రగిరి నియోజకవర్గ అధ్యక్షులు ఈశ్వర్ గౌడ్, తిరుపతి నియోజకవర్గ అధ్యక్షులు మదన్ మోహన్, జిల్లా ఉపాధ్యక్షులు పంట్రగం వెంకటేశ్, కేవీ పురం మండల అధ్యక్షులు పరంధమం, బోడయ్య తదితరులు పాల్గొన్నారు.