రాష్ట్రములోని బెస్తలు కూటమి వెంటే: నారా లోకేష్‌కు కృతజ్ఞతలు తెలిపిన బెస్త మల్లికార్జున

మంగళగిరి:

స్థానికంగా మంగళగిరిలోని తెలుగుదేశం పార్టీ జాతీయ కార్యాలయంలో శుక్రవారం బూత్ అబ్జర్వర్ల వర్క్‌షాప్ నిర్వహించారు. ఈ కార్యక్రమానికి విద్య, ఐటీ శాఖ మంత్రి గౌరవనీయులు శ్రీ నారా లోకేష్ హాజరై, పాల్గొన్న నాయకులకు దిశానిర్దేశం చేశారు. బూత్ స్థాయికి వెళ్లి అక్కడి పరిస్థితులను సమగ్రంగా తెలుసుకోవాలని, కనీసం ప్రతి బూత్‌కు ఒక రోజు సమయం కేటాయించి, బూత్‌లో పార్టీ నిర్మాణం ఎలా బలపడుతుందో చర్చించి నివేదిక ఇవ్వాలని సూచించారు.

అనంతరం నారా లోకేష్‌ను మర్యాదపూర్వకంగా కలిసిన ఆంధ్రప్రదేశ్ బెస్త ఫైనాన్స్ కార్పొరేషన్ స్టేట్ డైరెక్టర్, ప్రజా వైద్యశాల బెస్త మల్లికార్జున మాట్లాడుతూ, రాష్ట్రంలో కూటమి ప్రభుత్వం అధికారంలోకి రావడంలో బెస్తల పాత్ర కీలకమైందని అన్నారు. బెస్త సామాజిక వర్గానికి ప్రభుత్వం గుర్తింపు ఇస్తూ బెస్త కార్పొరేషన్‌కు చైర్మన్, డైరెక్టర్లను నియమించడం అభినందనీయమని పేర్కొన్నారు. అలాగే ఆఫ్కౌఫ్ (ఫిషరీస్) చైర్మన్‌గా, తెలుగుదేశం పార్టీ బెస్త సాధికార కమిటీ రాష్ట్ర అధ్యక్షుడిగా పనిచేసిన యువనేత కడప యాటగిరి రాం ప్రసాద్ ఎంపిక కావడం పట్ల ఆనందం వ్యక్తం చేశారు. రాం ప్రసాద్ ఎంపికతో రాష్ట్రంలో బెస్తలకు రాజకీయ గుర్తింపు మరింత బలపడిందని తెలిపారు. ఈ సందర్భంగా రాష్ట్రంలోని బెస్త సామాజిక వర్గం తరఫున నారా లోకేష్‌కు కృతజ్ఞతలు తెలియజేశారు.

దీనికి స్పందించిన నారా లోకేష్ మాట్లాడుతూ, కూటమి ప్రభుత్వం అధికారంలోకి వచ్చిన వెంటనే మత్స్యకారుల ఉపాధిపై ప్రభావం చూపిన జీఓ 217ను రద్దు చేసినట్లు తెలిపారు. అలాగే మత్స్యకారులకు 50 సంవత్సరాల వయస్సు నుంచే పింఛన్ అందించడం ముఖ్యమంత్రి చంద్రబాబు నాయుడు నాయకత్వంలో అమలైన ముఖ్య నిర్ణయమని చెప్పారు. మత్స్యకారులకు పలు సంక్షేమ పథకాలు అమలు చేస్తున్నామని, ప్రభుత్వానికి మరియు సమాజానికి మధ్య వారధిగా ఉండే నాయకులు బెస్తల విద్య, సంక్షేమం, అభివృద్ధికి సంబంధించిన అవసరాలను ప్రభుత్వ దృష్టికి తీసుకువచ్చి సమస్యల పరిష్కారానికి కృషి చేయాలని సూచించారు. ప్రభుత్వం అప్పగించిన బాధ్యతలను సమర్థవంతంగా నిర్వహించి మంచి పేరు తీసుకురావాలని కోరారు.