శేరిలింగంపల్లి రాయదుర్గం దర్గా యాదవ సంఘం ఆధ్వర్యంలో నూతన సంవత్సర యాదవ క్యాలెండర్ ఆవిష్కరణ

శేరిలింగంపల్లి రాయదుర్గం దర్గా యాదవ సంఘం ఆధ్వర్యంలో నూతన సంవత్సర యాదవ క్యాలెండర్ ఆవిష్కరణ

శేరిలింగంపల్లి:

శేరిలింగంపల్లి రాయదుర్గం దర్గా యాదవ సంఘం ఆధ్వర్యంలో నూతన సంవత్సర యాదవ క్యాలెండర్ ఆవిష్కరణ కార్యక్రమం ఘనంగా జరిగింది. ఈ కార్యక్రమంలో బీసీ ఐక్య వేదిక తెలంగాణ రాష్ట్ర అధ్యక్షులు బేరి రామచందర్ యాదవ్ ముఖ్య అతిథిగా పాల్గొని క్యాలెండర్‌ను ఆవిష్కరించారు. కార్యక్రమాన్ని యాదవ సంఘం నేత నాగపురి అశోక్ యాదవ్ సమన్వయంతో నిర్వహించారు.

ఈ సందర్భంగా బేరి రామచందర్ యాదవ్ మాట్లాడుతూ, అఖిల భారత యాదవ మహాసభ స్థాపించి వంద సంవత్సరాలు పూర్తైన తరుణంలో యాదవులు గల్లీ నుంచి ఢిల్లీ వరకు తమ సామాజిక, రాజకీయ ఉనికిని చాటుకున్నారని అన్నారు. యాదవులు ఐక్యంగా ముందుకు సాగితే మరింత బలంగా ఎదగగలరని స్పష్టం చేశారు.

పాడి పరిశ్రమపై మాట్లాడిన ఆయన, సంప్రదాయంగా యాదవుల ఆధీనంలో ఉన్న పాల వ్యాపారం క్రమంగా కార్పొరేట్ కంపెనీల చేతుల్లోకి వెళ్లిపోతున్నదని ఆవేదన వ్యక్తం చేశారు. దీని వల్ల యాదవ పాడి రైతులు తీవ్రంగా నష్టపోతున్నారని పేర్కొన్నారు.

ప్రభుత్వాన్ని ఉద్దేశించి పలు డిమాండ్లు చేశారు. పాడి పరిశ్రమపై ఆధారపడిన యాదవులకు ప్రభుత్వ స్థలాల్లో పశువుల మేతకు అవసరమైన సౌకర్యాలు కల్పించాలని, యాదవులకు కార్పొరేట్ స్థాయిలో పాల డైరీలను కేటాయించాలని డిమాండ్ చేశారు. అలాగే బడుగు, బలహీన వర్గాల అభివృద్ధికి ప్రత్యేక నిధులు కేటాయించాలని కోరారు.

రాజకీయ చైతన్యం పెరిగినప్పుడే యాదవులకు రావాల్సిన న్యాయమైన వాటా దక్కుతుందని బేరి రామచందర్ యాదవ్ తెలిపారు. రాబోయే గ్రేటర్ ఎన్నికల్లో యాదవులు, బీసీలు ఐక్యంగా నిలబడి విజయాన్ని సాధించాలని పిలుపునిచ్చారు.

ఈ కార్యక్రమంలో యాదవ సంఘం ప్రతినిధులు అప్పల కృష్ణ యాదవ్, నాగపురి అశోక్ యాదవ్, మహేష్ యాదవ్, బండా ప్రవీణ్ యాదవ్తో పాటు పలువురు సంఘ సభ్యులు పాల్గొని కార్యక్రమాన్ని విజయవంతం చేశారు.