5జీ సేవల్లో రెండో స్థానంలో భారత్ – 40 కోట్లకు చేరిన వినియోగదారులు

5జీ సేవలు అంచనాలను మించి విస్తరించాయి. కేంద్ర కమ్యూనికేషన్స్ మంత్రి జ్యోతిరాదిత్య సింధియా గారు వెల్లడించిన వివరాల ప్రకారం, దేశంలో 5జీ వినియోగదారుల సంఖ్య 40 కోట్లను దాటింది. దీంతో ప్రపంచంలోనే రెండో అతిపెద్ద 5జీ వినియోగదారుల దేశంగా భారత్ నిలిచింది. తొలి స్థానంలో చైనా కొనసాగుతోంది.

2022 అక్టోబర్‌లో ప్రారంభమైన 5జీ సేవలు కేవలం మూడు సంవత్సరాల్లోనే కోట్లాది మంది జీవితాల్లో భాగమయ్యాయి. అతి తక్కువ కాలంలో ఈ స్థాయిలో విస్తరణ సాధించడం భారత టెలికాం రంగానికి చారిత్రక విజయంగా నిపుణులు అభివర్ణిస్తున్నారు.

అందుబాటు ధరలు, వేగవంతమైన నెట్‌వర్క్ విస్తరణ, దేశవ్యాప్తంగా టవర్ల ఏర్పాటు వంటి అంశాలు 5జీ విస్తృతికి ప్రధాన కారణాలుగా నిలిచాయి. పట్టణాలతో పాటు గ్రామీణ ప్రాంతాల్లో కూడా 5జీ సేవలు వేగంగా విస్తరిస్తుండటంతో డిజిటల్ విభజన తగ్గుతున్నట్లు తెలుస్తోంది.

5జీ సాంకేతికత వల్ల ఆరోగ్యం, విద్య, వ్యవసాయం, పరిశ్రమలు, స్టార్టప్ రంగాలకు కొత్త ఊపొచ్చింది. టెలీమెడిసిన్, ఆన్‌లైన్ విద్య, స్మార్ట్ వ్యవసాయం, ఆటోమేషన్ వంటి రంగాల్లో విప్లవాత్మక మార్పులు చోటు చేసుకుంటున్నాయి.

ప్రపంచంలోనే వేగంగా ఎదుగుతున్న 5జీ మార్కెట్‌గా భారత్ అవతరించడం, డిజిటల్ ఇండియా లక్ష్యానికి మరింత బలం చేకూరుస్తోందని నిపుణులు పేర్కొంటున్నారు.